Reseide mekteptegi shabýyl saldarynan qaza tapqan 10 jastaǵy Qobildjon Álievtiń máiiti Tájikstanǵa jetkizildi, dep habarlaidy Dalanews.kz.
Marqum eline qaitar kúni qaitys bolǵan
Azattyq radiosynyń málimetinshe, Qobildjon Áliev 17 jeltoqsanda inisi jáne aǵasymen birge Tájikstanǵa qaitpaq bolǵan. Alaida ushardan bir kún buryn Máskeý oblysynyń Odintsovo aýdanyndaǵy mektepterdiń birinde kámeletke tolmaǵan jasóspirimniń shabýylynan qaza tapty.
Qoshtasý rásimi búgin ótedi
Marqummen qoshtasý jáne jerleý rásimi 18 jeltoqsan kúni Tájikstannyń Shahrinav aýdanyndaǵy Cheptýra aýylynda ótedi. Aqparatqa sáikes, balanyń anasy men jaqyn týystary jerleý rásimine qatysý úshin elge kelgen.
Áýejaida qaýipsizdik sharalary kúsheitilgen
Tańerteń marqumnyń jaqyndary Dýshanbe halyqaralyq áýejaiynda reis kútken. Alaida olar jýrnalisterge túsinikteme berýden bas tartqan. Shetelden jetkizilgen máiitter qabyldanatyn aýmaqta quqyq qorǵaý organdary kúsheitilgen rejimde kezekshilik atqardy.
Jýrnalisterge máiitti tapsyrý sátin túsirýge ruqsat berilmegen. Keibir tilshilerdiń aitýynsha, qaýipsizdik qyzmeti túsirilgen kadrlardy óshirýdi talap etken.
Ushaq tańǵy saǵat 5:30-da qonýy josparlanǵanymen, reis keshigip, shamamen tańǵy 8-de keletindigi habarlanǵan. Keiinirek máiittiń basqa shyǵý jolynan áketilgeni belgili boldy.
Marqum ákesiniń janyna jerlenedi
Otbasy týystary Qobildjon Álievtiń máiiti Shahrinav aýdanyna jol tartqanyn rastady. Ol úsh jyl buryn syrqattan kóz jumǵan, kúshtik qurylymdarda qyzmet etken ákesiniń janyna jerlenbek.
Qaiǵyly oqiǵanyń mán-jaiy
Oqiǵa 16 jeltoqsanda boldy. Tergeý málimetinshe, kámeletke tolmaǵan jasóspirim pyshaqpen mektepke kirip, kúzetshini jaraqattap, Kobildjon Álievtiń birneshe jerine pyshaq suqqan.
Balanyń ólimi Tájikstan qoǵamynda úlken rezonans týdyrdy. Eldiń Syrtqy ister ministrligi bul shabýyldy ultaralyq óshpendilik negizinde jasalǵan qylmys dep baǵalap, qatań aiyptady.
Sonymen qatar Ishki ister ministrligi vedomstvo basshysy Ramazon Rahimzodanyń Reseidiń IIM basshysy Vladimir Kolokoltsevpen sóilesip, isti jan-jaqty ári ádil tergeýdi talap etkenin málimdedi.
Quqyq qorǵaýshylardyń aitýynsha, bul Reseide tájik balalaryna qatysty tirkelgen alǵashqy qaiǵyly oqiǵa emes.
