Bekshınniń atap ótkenindeı mundaı ótinish túsirgen ata-analardyń balalary qashyqtan oqı alady.
Álemjelidegi paraqshasynda mektep oqýshylarynyń máselesine qatysty sońǵy qaýlysyn tarqatyp túsindirgen bas sanıtar qashyqtan oqýdyń talaptaryna toqtaldy.
Onyń aıtýynsha, oqýshylardyń basym bóligi mınıstr Aımaǵambetovtyń buıryǵyna saı sanıtarlyq sharalardy saqtaı otyra, dástúrli formatta oqıtyn bolady. Alaıda ata-analardyń suraýy boıynsha onlaın oqýǵa da múmkindik beriledi.
“Biz tynys alý júıesinde sozylmaly syrqaty bar oqýshylarǵa bilim alýdy onlaın negizde jalǵastyrýdy usyndyq. Budan bólek indettiń taralý qarqynyna alańdaǵan keıbir ata-analar deni saý balalaryna da onlaın oqýǵa múmkindik berýdi suraýda. Biz olardyń ótinishin eskerýsiz qaldyrmaımyz, sońǵy qaýlyda biz muny qarastyrdyq. Ata-analardyń talap-tilegi boıynsha qashyqtan oqýǵa bolady”, – dedi Bekshın.
Dese de, munyń qalaı júzege asaryn ashyp aıtpaǵanyn atap ótý kerek.
Bekshınniń Almatydaǵy epıdahýalǵa qatysty sońǵy qaýlysy 16-shy tamyzda qabyldanǵan-tuǵyn.
Soǵan sáıkes senbi-jeksenbi kúnderi qoǵamdyq obektilerdiń jumysyna tyıym salý 31 tamyzǵa deıin uzartylǵan.
Buǵan deıin eldegi epıdahýalǵa baǵa bergen mınıstr Soı respýblıkamyzdaǵy eń joǵary aýrýshańdyq deńgeıi Almaty qalasyna tıesili ekenin aıtqan. Sondyqtan munda qatań karantındik shekteýler engizilgen.
“Almatyda jaǵdaı úreıli, ólim deńgeıi joǵary, aýrýshańdyq deńgeıi respýblıkamyzdaǵy eń joǵary kórsetkishterdiń biri, sondyqtan shekteý sharalary qazirgi jaǵdaıǵa sáıkes keledi. Tarazy basynda el azamattarynyń ómiri tur. Biz barlyǵyn egjeı-tegjeıli qarap jatyrmyz jáne birinshi múmkindikte jeńildikter jasaımyz, bızneske jumys jasaýǵa múmkindik beremiz”, – dedi mınıstr.
https://dalanews.kz/news/66839-karantin-qashan-zhengildeydi-ministr-co
