Солтүстік Қазақстан облысында шетелдіктердің елде болу заңдылығы тексеріліп жатыр, деп хабарлайды Dala News.

Полиция қызметкерлері «Мигрант» жедел-профилактикалық іс-шарасы аясында базарлар, вокзалдар, құрылыс нысандары мен қоғамдық тамақтану орындарын бақылауға алған.

Жыл басынан бері өңірде 3 334 миграциялық заңбұзушылық анықталған. Қайталанған құқықбұзушылықтар үшін 10 шетелдік елден шығарылды.

Полиция мәліметінше, заңбұзушылықтардың басым бөлігі:
– шетелдіктердің елде болу мерзімін бұзуымен,
– қазақстандықтардың шетелдік қонақтар туралы уақытылы хабарламауымен байланысты.

Қазіргі таңда өңірде 10 775 шетел азаматы тұрады. Оның ішінде:
– 6 347 адам – тұрақты,
– 4 428 адам – уақытша тұруға рұқсат алған.

«Мигрант» іс-шарасы 17 наурыздан басталып, қоғамдық тәртіп пен заңдылықты күшейтуге бағытталған.