Израиль мен ХАМАС арасындағы бітім күшіне енді. Алғашқы кезеңде ЦАХАЛ келісілген шептерге шегінеді, ал топ барлық тұтқындарды босатады, деп хабарлайды Dalanews.kz.
Газада атысты тоқтату режимі күшіне енді. ХАМАС қозғалысымен тиісті келісімді Израиль үкіметі бекітті. Алғашқы кезең аясында ХАМАС тірі қалған барлық тұтқындарды босатады, ал Израиль армиясы әскерін шегіндіруді бастайды.
10 қазанға қараған түні Израиль Министрлер кабинеті радикалды ХАМАС қозғалысымен бітім жөніндегі келісімді бекітті. Израиль премьер-министрінің кеңсесі РБК-ға түсіндіргендей, дәл осы сәттен бастап атысты тоқтату режимі күшіне енді.
Келісімнің өзі бұған дейін, 9 қазанда, Мысырдың Шарм-эш-Шейх қаласында жасалған. Оның негізіне АҚШ президенті Дональд Трамп өткен аптада ұсынған жоспар алынған.
Бірінші кезеңнің шарттары
Бірінші кезеңде Израильдің Қорғаныс армиясы (ЦАХАЛ) әскерін Газаның ішіндегі бұрын келісілген шептерге - «сары сызық» деп аталатын аумаққа дейін шегіндіреді. ЦАХАЛ өкілдері келісімді іске асыруға дайындық басталғанын хабарлады.
«Бұл процесс аясында түзетілген орналастыру шептеріне көшуге арналған әскери хаттама дайындалып жатыр», - деп нақтылады олар.
Reuters агенттігінің мәліметінше, Израиль бөлімшелерінің шегінуі келісім күшіне енгеннен кейін 24 сағат ішінде аяқталуы тиіс.
Одан кейінгі 72 сағат ішінде ХАМАС Израиль жағына тірі қалған барлық тұтқындарды және өз қолындағы қаза тапқандардың денелерін қайтаруы керек. Reuters дерегінше, бұл процесс екі кезеңде жүреді: тірі қалған тұтқындарды жексенбі немесе дүйсенбі күні тапсырады. Ал қаза тапқандардың денесін жинау мен жеткізуге көбірек уақыт кетуі мүмкін. ХАМАС өкілдері кейбір мәйіттердің орналасқан жері белгісіз екенін айтқан.
Осыған байланысты Израиль мен халықаралық делдалдар - АҚШ, Мысыр, Катар және соңғы келіссөздерге қатысқан Түркия - жоғалған денелерді іздеу үшін бірлескен жедел топ құрады.
Қазір ХАМАС тұтқынында 48 адам бар, олардың тек 20-сы тірі деп саналады. Қаза тапқандар арасында 2014 жылы Газада өлтірілген ЦАХАЛ сарбазы да бар.
Трамп жоспарына сәйкес, бұған жауап ретінде Израиль 1950 палестиналық тұтқынды, соның ішінде өмір бойы түрме жазасын өтеп жатқандардың 250-ін босатады.
«Қайтарылған әрбір израильдік тұтқынның сүйегіне айырбас ретінде Израиль Газадағы 15 адамның сүйегін қайтарады», - делінген Трамп ұсынған жоспарда.
