Ұлттық банк базалық мөлшерлеме бойынша қандай шешім қабылдағаны белгілі болды, деп хабарлайды Dalanews.kz.

Ұлттық банктің Ақша-кредит саясаты комитеті базалық мөлшерлемені +/- 1 п.т. жылдық 18,0% деңгейінде белгілеу туралы шешім қабылдады.

Айта кетейік, наурызда жылдық инфляция 11%-ға дейін баяулаған (ақпанда 11,7%): азық-түлік инфляциясы 11,7% (12,7%), азық-түлікке жатпайтын инфляция 11,3% (11,6%), сервистік инфляция 10,0% (10,8%) болған. Инфляция баяулауына бірқалыпты қатаң ақша-кредит шарттары, айырбас бағамының қолайлы серпіні, тұтынушылық кредит қарқыны баяулауы аясында тұтынушылық сұраныс тұрақтауы, сондай-ақ, ТКҚ мен ЖЖМ бағасын өсіруге қойылған мораторий мен Үкіметтің басқа да инфляцияға қарсы шаралары септігін тигізген.

Базалық мөлшерлеме бойынша кезекті шешім 5 маусымда сағат 12:00-де жарияланады.

Базалық мөлшерлеме дегеніміз не және ол неліктен маңызды?

Базалық мөлшерлеме – Ұлттық банк белгілейтін негізгі пайыздық көрсеткіш. Ол арқылы банк секторының жалпы бағыты айқындалып, елдегі несие мен инфляция деңгейіне әсер етеді. Бұл көрсеткіш бойынша Ұлттық банк коммерциялық ұйымдарға қысқа мерзімді несие береді және олардың қаражатын депозит ретінде қабылдайды.

Қарапайым тілмен айтқанда, базалық мөлшерлеме – ел экономикасының "бағдаршамы". Егер оны көтерсе, несие алу қымбаттайды, ал түсірсе керісінше арзан несие алу мүмкіндігі артады. Осылайша, Ұлттық банк осы тетік арқылы ақша айналымын реттеп, баға тұрақтылығын сақтауға тырысады.