АҚШ президенті Дональд Трамп Әділет министрлігіне мұнай компанияларының қызметін тексеруді тапсырды. Ол мұнай бағасы арзандағанымен, бензин құнының әлі де жоғары болып тұрғанына наразылық білдірді, деп хабарлайды dalanews.kz.
Соңғы апталарда АҚШ пен Иран арасындағы дипломатиялық келіссөздер мұнай нарығындағы қысымды бәсеңдетіп, соның нәтижесінде елде бензин бағасы алты апта қатарынан төмендеген. Соған қарамастан, Трамп мұнай өндіруші компаниялар тұтынушылар есебінен шамадан тыс пайда тауып отыр деп есептейді. Оның пікірінше, бұл – әділетсіз баға саясатының көрінісі.
Бензин бағасы АҚШ-тағы ең өзекті әлеуметтік-экономикалық мәселелердің бірі саналады. Жанармай құнының өсуі халықтың күнделікті шығынына тікелей әсер етеді. Осыған байланысты бұл тақырып қарашада өтетін аралық сайлау қарсаңындағы негізгі экономикалық мәселелердің біріне айналуы мүмкін.
«Бензин бағасы әлдеқайда төмен болуы керек. Мұнай компаниялары бағаны әдейі көтеріп, пайда тауып отырған болуы мүмкін. Олар мұндай әрекетке бармаған шығар деп үміттенемін. Әйтпесе үлкен қиындыққа тап болады. Біз мұнымен ойнап отырған жоқпыз», – деді Трамп.
