AQSh prezidenti Donald Tramp Ádilet ministrligine munai kompaniialarynyń qyzmetin tekserýdi tapsyrdy. Ol munai baǵasy arzandaǵanymen, benzin qunynyń áli de joǵary bolyp turǵanyna narazylyq bildirdi, dep habarlaidy dalanews.kz.
Sońǵy aptalarda AQSh pen Iran arasyndaǵy diplomatiialyq kelissózder munai naryǵyndaǵy qysymdy báseńdetip, sonyń nátijesinde elde benzin baǵasy alty apta qatarynan tómendegen. Soǵan qaramastan, Tramp munai óndirýshi kompaniialar tutynýshylar esebinen shamadan tys paida taýyp otyr dep esepteidi. Onyń pikirinshe, bul – ádiletsiz baǵa saiasatynyń kórinisi.
Benzin baǵasy AQSh-taǵy eń ózekti áleýmettik-ekonomikalyq máselelerdiń biri sanalady. Janarmai qunynyń ósýi halyqtyń kúndelikti shyǵynyna tikelei áser etedi. Osyǵan bailanysty bul taqyryp qarashada ótetin aralyq sailaý qarsańyndaǵy negizgi ekonomikalyq máselelerdiń birine ainalýy múmkin.
«Benzin baǵasy áldeqaida tómen bolýy kerek. Munai kompaniialary baǵany ádeii kóterip, paida taýyp otyrǵan bolýy múmkin. Olar mundai áreketke barmaǵan shyǵar dep úmittenemin. Áitpese úlken qiyndyqqa tap bolady. Biz munymen oinap otyrǵan joqpyz», – dedi Tramp.
