Қазақстан президенті Қасым-Жомарт Тоқаев балаларды интернеттегі зиянды контенттен қорғау шараларын күшейту қажет екенін мәлімдеді. Ол тамыз конференциясы барысында үкімет әзірлеген заң жобасында 16 жасқа толмаған пайдаланушылардың әлеуметтік желілерде тіркелуіне тыйым салу қарастырылғанын айтты, деп хабарлайды dalanews.kz.
Президенттің сөзінше, аталған құжат Парламент қарауына енгізілген. Құрылтайдың алғашқы сессиясының ашылуында ол депутаттарға бұл мәселені жан-жақты талқылауды ұсынған.
Тоқаевтың айтуынша, баланың қалыптасуына отбасы мен мектептен бөлек сыртқы орта да айтарлықтай әсер етеді.
«Сыртқы орта балалардың қалыптасуына отбасы мен мектептен кем әсер етпейді. Өскелең ұрпақтың психологиялық әл-ауқаты, эмоциялық тұрақтылығы мен адамгершілік тәрбиесі ұлттық қауіпсіздік пен елдің орнықты дамуының маңызды факторына айналды», – деді президент.
Мемлекет басшысы 2018 жылы қабылданған балаларды денсаулығы мен дамуына зиян келтіретін ақпараттан қорғау туралы заң қазіргі жағдайға сай қайта қаралып, елеулі өзгерістер енгізуді қажет ететінін атап өтті. Оның айтуынша, мұндай шектеулерді әлемнің бірқатар мемлекеті де енгізіп жатыр.
«Балалардың психологиялық жағдайына төнетін қауіптердің салдарымен күресуден гөрі, олардың алдын алуға көшетін уақыт келді деп есептеймін. Әйтпесе бұл қоғамның тұрақтылығына кері әсер етуі мүмкін», – деді Қасым-Жомарт Тоқаев.
Сондай-ақ президент Үкіметке кәмелетке толмағандарды қорғау үшін интернеттегі контентті сүзгіден өткізу шараларын күшейтуді тапсырды. Оның пікірінше, бұл мәселеде тек ата-аналардың жауапкершілігіне ғана сеніп отыру жеткіліксіз.
Бұдан бөлек, Тоқаев балаларға арналған міндетті SIM-карталарды енгізу жобасын кең көлемде іске асыруды тапсырды. Президенттің айтуынша, бұл бастама балалардың ақпараттық қауіпсіздігін қамтамасыз етуге көмектесуі тиіс.
