Qazaqstan prezidenti Qasym-Jomart Toqaev balalardy internettegi ziiandy kontentten qorǵaý sharalaryn kúsheitý qajet ekenin málimdedi. Ol tamyz konferentsiiasy barysynda úkimet ázirlegen zań jobasynda 16 jasqa tolmaǵan paidalanýshylardyń áleýmettik jelilerde tirkelýine tyiym salý qarastyrylǵanyn aitty, dep habarlaidy dalanews.kz.
Prezidenttiń sózinshe, atalǵan qujat Parlament qaraýyna engizilgen. Quryltaidyń alǵashqy sessiiasynyń ashylýynda ol depýtattarǵa bul máseleni jan-jaqty talqylaýdy usynǵan.
Toqaevtyń aitýynsha, balanyń qalyptasýyna otbasy men mektepten bólek syrtqy orta da aitarlyqtai áser etedi.
«Syrtqy orta balalardyń qalyptasýyna otbasy men mektepten kem áser etpeidi. Óskeleń urpaqtyń psihologiialyq ál-aýqaty, emotsiialyq turaqtylyǵy men adamgershilik tárbiesi ulttyq qaýipsizdik pen eldiń ornyqty damýynyń mańyzdy faktoryna ainaldy», – dedi prezident.
Memleket basshysy 2018 jyly qabyldanǵan balalardy densaýlyǵy men damýyna ziian keltiretin aqparattan qorǵaý týraly zań qazirgi jaǵdaiǵa sai qaita qaralyp, eleýli ózgerister engizýdi qajet etetinin atap ótti. Onyń aitýynsha, mundai shekteýlerdi álemniń birqatar memleketi de engizip jatyr.
«Balalardyń psihologiialyq jaǵdaiyna tónetin qaýipterdiń saldarymen kúresýden góri, olardyń aldyn alýǵa kóshetin ýaqyt keldi dep esepteimin. Áitpese bul qoǵamnyń turaqtylyǵyna keri áser etýi múmkin», – dedi Qasym-Jomart Toqaev.
Sondai-aq prezident Úkimetke kámeletke tolmaǵandardy qorǵaý úshin internettegi kontentti súzgiden ótkizý sharalaryn kúsheitýdi tapsyrdy. Onyń pikirinshe, bul máselede tek ata-analardyń jaýapkershiligine ǵana senip otyrý jetkiliksiz.
Budan bólek, Toqaev balalarǵa arnalǵan mindetti SIM-kartalardy engizý jobasyn keń kólemde iske asyrýdy tapsyrdy. Prezidenttiń aitýynsha, bul bastama balalardyń aqparattyq qaýipsizdigin qamtamasyz etýge kómektesýi tiis.
