قازاقستان پرەزيدەنتٸ قاسىم-جومارت توقاەۆ بالالاردى ينتەرنەتتەگٸ زيياندى كونتەنتتەن قورعاۋ شارالارىن كٷشەيتۋ قاجەت ەكەنٸن مەلٸمدەدٸ. ول تامىز كونفەرەنتسيياسى بارىسىندا ٷكٸمەت ەزٸرلەگەن زاڭ جوباسىندا 16 جاسقا تولماعان پايدالانۋشىلاردىڭ ەلەۋمەتتٸك جەلٸلەردە تٸركەلۋٸنە تىيىم سالۋ قاراستىرىلعانىن ايتتى, دەپ حابارلايدى dalanews.kz.
پرەزيدەنتتٸڭ سٶزٸنشە, اتالعان قۇجات پارلامەنت قاراۋىنا ەنگٸزٸلگەن. قۇرىلتايدىڭ العاشقى سەسسيياسىنىڭ اشىلۋىندا ول دەپۋتاتتارعا بۇل مەسەلەنٸ جان-جاقتى تالقىلاۋدى ۇسىنعان.
توقاەۆتىڭ ايتۋىنشا, بالانىڭ قالىپتاسۋىنا وتباسى مەن مەكتەپتەن بٶلەك سىرتقى ورتا دا ايتارلىقتاي ەسەر ەتەدٸ.
«سىرتقى ورتا بالالاردىڭ قالىپتاسۋىنا وتباسى مەن مەكتەپتەن كەم ەسەر ەتپەيدٸ. ٶسكەلەڭ ۇرپاقتىڭ پسيحولوگييالىق ەل-اۋقاتى, ەموتسييالىق تۇراقتىلىعى مەن ادامگەرشٸلٸك تەربيەسٸ ۇلتتىق قاۋٸپسٸزدٸك پەن ەلدٸڭ ورنىقتى دامۋىنىڭ ماڭىزدى فاكتورىنا اينالدى», – دەدٸ پرەزيدەنت.
مەملەكەت باسشىسى 2018 جىلى قابىلدانعان بالالاردى دەنساۋلىعى مەن دامۋىنا زييان كەلتٸرەتٸن اقپاراتتان قورعاۋ تۋرالى زاڭ قازٸرگٸ جاعدايعا ساي قايتا قارالىپ, ەلەۋلٸ ٶزگەرٸستەر ەنگٸزۋدٸ قاجەت ەتەتٸنٸن اتاپ ٶتتٸ. ونىڭ ايتۋىنشا, مۇنداي شەكتەۋلەردٸ ەلەمنٸڭ بٸرقاتار مەملەكەتٸ دە ەنگٸزٸپ جاتىر.
«بالالاردىڭ پسيحولوگييالىق جاعدايىنا تٶنەتٸن قاۋٸپتەردٸڭ سالدارىمەن كٷرەسۋدەن گٶرٸ, ولاردىڭ الدىن الۋعا كٶشەتٸن ۋاقىت كەلدٸ دەپ ەسەپتەيمٸن. ەيتپەسە بۇل قوعامنىڭ تۇراقتىلىعىنا كەرٸ ەسەر ەتۋٸ مٷمكٸن», – دەدٸ قاسىم-جومارت توقاەۆ.
سونداي-اق پرەزيدەنت ٷكٸمەتكە كەمەلەتكە تولماعانداردى قورعاۋ ٷشٸن ينتەرنەتتەگٸ كونتەنتتٸ سٷزگٸدەن ٶتكٸزۋ شارالارىن كٷشەيتۋدٸ تاپسىردى. ونىڭ پٸكٸرٸنشە, بۇل مەسەلەدە تەك اتا-انالاردىڭ جاۋاپكەرشٸلٸگٸنە عانا سەنٸپ وتىرۋ جەتكٸلٸكسٸز.
بۇدان بٶلەك, توقاەۆ بالالارعا ارنالعان مٸندەتتٸ SIM-كارتالاردى ەنگٸزۋ جوباسىن كەڭ كٶلەمدە ٸسكە اسىرۋدى تاپسىردى. پرەزيدەنتتٸڭ ايتۋىنشا, بۇل باستاما بالالاردىڭ اقپاراتتىق قاۋٸپسٸزدٸگٸن قامتاماسىز ەتۋگە كٶمەكتەسۋٸ تيٸس.
