Петропавл қаласының Береке шағын ауданында 600 орындық жаңа мектеп ашылды. Білім ордасы Мемлекет басшысының тапсырмасымен жүзеге асып жатқан «Келешек мектептері» ұлттық жобасы аясында салынған,- деп хабарлайды Dalanews.kz
Ашылу рәсіміне облыс әкімі Ғауез Нұрмұхамбетов қатысып, өскелең ұрпаққа сапалы білім беру үшін қолайлы инфрақұрылым қалыптастырудың маңыздылығын атап өтті.
Жаңа мектеп заманауи талаптарға толық сай: STEM-зертханалар, робототехника, хореография кабинеттері, коворкинг аймақтары және спорт залдарымен жабдықталған. Оқу үдерісінде цифрлық технологиялар мен жасанды интеллект элементтері қолданылады.
«Заманауи мектептердің ашылуы – сапалы, қауіпсіз және қолжетімді білім беру саясатының нақты нәтижесі. Бұл бағыттағы жұмыстар жалғаса береді», – деді өңір басшысы.
