Шығыс Қазақстан облысында ЖРВИ-ге шалдығушылар көбейіп, Гонконг тұмауының 25 жағдайы расталды, деп хабарлайды Dalanews.kz.
Бұл туралы облыстық санитарлық-эпидемиологиялық бақылау департаменті басшысының орынбасары Евгений Пивоваров хабарлады.
«Облыста ЖРВИ-дің 63 035 жағдайы тіркелді, оның ішінде 14 жасқа дейінгі балалар арасында – 38 673 жағдай. 2024–2025 жылғы осындай кезеңмен салыстырғанда аурушаңдық 15,9 пайызға артты. Зертханалық түрде расталған тұмаудың 25 жағдайы анықталды, олардың барлығында A/H3N2 вирусы штамы анықталды, соның ішінде 10 жағдай 14 жасқа дейінгі балалар арасында тіркелді», — деді ол.
Оның айтуынша, бір жасқа дейінгі балалар, жүкті әйелдер және вакцина салдырғандар арасында гонконг тұмауына шалдығу жағдайлары тіркелмеген. Тұмау ауруын белсенді анықтау маусымдық вирус таралуымен, ауа-тамшылы жолымен жұғуымен, адамдардың көп шоғырлануымен және иммундық жүйенің жеткіліксіз тиімділігімен байланысты.
