Украин армиясында Сібір батальоны құрылуда. Оған қосылған якуттар мен буряттар Ресейдің сапында соғысып жатқан жерлестерін ағайын емес, миы шайылған мәңгүрт санайтынын айтты деп хабарлайды Dalanews.kz.

Киевке қарсы кең ауқымды агрессияда көптеген якуттар мен Сібірден келген буряттар Ресей армиясының құрамында соғысуда. Украин Қарулы күштерінің қатарына өткен Геннадий Манғатаев пен Сайдо Хомус якуттар мен буряттардың барлығы Ресейдің құлақкесті құлы емесін дәлелдегісі келеді.

Бурятиядан Украинаға қашқан Геннадий Манғатаев (29 жаста): «Олар (жерлестерім) "орыс әлемі" үшін соғысқанда менің жақыным болудан қалады. Ресей үкіметі салт-дәстүрімізді ұмыттырып, мәдениетімізді жоймақ, жойып та жатыр. Ұлтымның тамырына балта шауып, құрғын-сүргінге ұшыратқан Кремль үшін қан төкпеймін", - дейді.

Украин әскерінің сапында соғысу үшін Якутиядан қашып келген Сайдо Хомус та (34 жаста)  Генаның пікірін қостап отыр.

"Менің жерлестерімнің дерлігі мәңгүрт және сатқын. Мәңгүрттер – өткенін есіне алмайтын әлжуаз құлға айналған халық", - дейді ол (қырғыз жазушысы Шыңғыс Айтматовтың «Ғасырдан да ұзақ күн" атты әйгілі романынан).

Манғатаевтың айтуынша, оның отандастары Ресей армиясына негізінен жоқшылықтан арылу үшін келеді.

"Үйде олар айына 20-25 мың рубль (200-250 еуро) алады, ал әскерде 200 мың рубль (2 мың еуро) төлейді", - дейді Геннадий.



Украин халықаралық легионының құрамындағы "Сібір" батальоны жазда Сібірден келген әртүрлі ұлттардың әскери қызметкерлерін біріктіретін бөлімше ретінде құрылды. Гена мен Сайдо бөлімшеге биылғы жылдың қыркүйек айында келген.

Әзір батальон құрамындағы жауынгерлер майданға аттану үшін жаттығу жиындарын өткізуде. Батальонды соғысқа дайындап жатқан украиналық офицердің айтуынша, Сібірден қашып келіп жатқан сахалар мен буряттардың саны өсу үстінде.

...