Қазақстанда 2026 жылдың екінші тоқсанында кедейлік деңгейі 5%-ды құрады. Бір жыл бұрын бұл көрсеткіш 5,1% болған, деп хабарлайды dalanews.kz.
Ұлттық статистика бюросының дерегіне сәйкес, елдегі Джини коэффициенті 0,283 болды. Ал ең жоғары және ең төмен табыс алатын халық топтарының арасындағы айырмашылық 5,65 есеге жеткен.
Кедейлік көрсеткішін бағалауда абсолютті және салыстырмалы тәсілдер қолданылады. Абсолютті кедейлік адамның табысы белгіленген ең төменгі шектен төмен болған жағдайда есептеледі. Ал салыстырмалы кедейлік халықтың табысы елдегі медианалық табыстың белгілі бір үлесінен төмен болған кезде анықталады.
Қазақстанда абсолютті кедейлікті бағалауда күнкөріс минимумы маңызды көрсеткіштердің бірі саналады. Биыл оның мөлшері 50 851 теңге болды.
Сараптамалық түсіндірулерде кедейлік деңгейін толық нөлге түсіру іс жүзінде мүмкін емес екені айтылады. Себебі экономика мен халықтың табысы өскен сайын салыстырмалы кедейлікті есептеудегі шек те өзгереді.
Мысалы, 2025 жылдың қорытындысы бойынша АҚШ-та ресми кедейлік деңгейі 10,2% болған. Еуропалық одақта кедейлік немесе әлеуметтік оқшаулану қаупіндегі халықтың үлесі 16,3%-ды құраған.
Сонымен бірге Қазақстандағы көрсеткішті төмендету мүмкіндігі сақталады. Бұл үшін халықтың табысын арттырумен қатар, еңбек өнімділігін көтеру, жұмыспен қамту сапасын жақсарту және әлеуметтік қолдау шараларын тиімді пайдалану маңызды.
Қазақстанда әлеуметтік төлемдер мемлекеттік бюджеттің шығыстарындағы негізгі бағыттардың бірі болып қала береді.
