Бұрынғы дипломат Сәкен Мамаш ісіне қатысты жаңа деректер белгілі болды, – деп хабарлайды Dalanews.kz.
KursivMedia мәліметінше, Қазақстанның Біріккен Араб Әмірліктеріндегі елшісінің кеңесшісі болған Сәкен Мамашқа қатысты соталды тергеу аяқталған. Бұл туралы Астана қаласы Полиция департаменті хабарлаған.
"Сәкен Мамашқа қатысты соталды тергеп-тексеру аяқталды және қылмыстық іс бойынша қабылданған процестік шешімнің заңдылығын тексеру үшін прокуратураға жолданды", – деп жазылған ақпаратта.
Айта кетейік, соталды тергеуді Астананың Есіл ауданы полиция басқармасы Қылмыстық кодекстің 110-бабы (қинау) бойынша жүргізген.
Мән-жай
Бұл іс жұртшылықтың назарын аударды, өйткені Сәкен Мамаш - Қазақстанның дипломатиялық қызметіне қатысы бар тұлға.
2024 жылғы мамырда Карина Госман (бұрын Мамаш) сол кезде БАӘ-дегі Қазақстан елшілігінде қызмет еткен жұбайы тарапынан зорлық-зомбылық жасалғанын мәлімдеді.
Ал жуырда әйелін ұрды деген айыппен бұрынғы дипломат Сәкен Мамаш Астанада қамауға алынды.
