Қазақстан Ресейден мұнай өнімдерін бажсыз жеткізу мүмкіндігін сақтайтын хаттаманы ратификациялады, 2026 жылы күтілетін үнем шамамен 30 млрд теңгені құрайды, деп хабарлайды dalanews.kz.
Құрылтай 2010 жылғы Қазақстан мен Ресей үкіметтері арасындағы Қазақстанға мұнай және мұнай өнімдерін жеткізу саласындағы сауда-экономикалық ынтымақтастық туралы келісімнің қолданылуын қайта бастау және оған өзгерістер енгізу туралы хаттаманы екі оқылымда қабылдады.
Хаттамаға сәйкес, екі ел арасында мұнай және мұнай өнімдерін жеткізудің индикативті баланстарын жыл сайын келісу тетігі сақталады. Сонымен қатар Қазақстан мен Ресейдің құзыретті органдары арасында ақпарат алмасу жалғасып, Ресейден мұнай өнімдерін бажсыз импорттау мүмкіндігі сақталады.
Бажсыз режим Қазақстанның ішкі нарығын мұнай өнімдерінің жекелеген түрлерімен қамтамасыз ету тұрғысынан маңызды. Құрылтайдың мәліметінше, 2026 жылы осы тетіктің арқасында күтілетін үнем шамамен 30 млрд теңгені құрайды.
Оның ішінде бензин бойынша 5,59 млрд теңге, дизель отыны бойынша 15,75 млрд теңге, ал авиациялық отын бойынша 8,61 млрд теңге үнемдеу жоспарланып отыр.
Келісімнің қолданылуын қайта бастау мұнай мен мұнай өнімдерін жеткізудің индикативті балансын қалыптастыру кезінде Қазақстан мен Ресей арасындағы ынтымақтастықтың халықаралық-құқықтық негізін де қамтамасыз етеді.
Құрылтай мәліметінше, хаттаманы ратификациялау екі ел арасындағы сауда-экономикалық байланыстарды жалғастырумен қатар, Қазақстанның ішкі мұнай өнімдері нарығының тұрақтылығын сақтауға және энергетикалық қауіпсіздігін қамтамасыз етуге мүмкіндік береді.
