Qazaqstan Reseiden munai ónimderin bajsyz jetkizý múmkindigin saqtaityn hattamany ratifikatsiialady, 2026 jyly kútiletin únem shamamen 30 mlrd teńgeni quraidy, dep habarlaidy dalanews.kz.
Quryltai 2010 jylǵy Qazaqstan men Resei úkimetteri arasyndaǵy Qazaqstanǵa munai jáne munai ónimderin jetkizý salasyndaǵy saýda-ekonomikalyq yntymaqtastyq týraly kelisimniń qoldanylýyn qaita bastaý jáne oǵan ózgerister engizý týraly hattamany eki oqylymda qabyldady.
Hattamaǵa sáikes, eki el arasynda munai jáne munai ónimderin jetkizýdiń indikativti balanstaryn jyl saiyn kelisý tetigi saqtalady. Sonymen qatar Qazaqstan men Reseidiń quzyretti organdary arasynda aqparat almasý jalǵasyp, Reseiden munai ónimderin bajsyz importtaý múmkindigi saqtalady.
Bajsyz rejim Qazaqstannyń ishki naryǵyn munai ónimderiniń jekelegen túrlerimen qamtamasyz etý turǵysynan mańyzdy. Quryltaidyń málimetinshe, 2026 jyly osy tetiktiń arqasynda kútiletin únem shamamen 30 mlrd teńgeni quraidy.
Onyń ishinde benzin boiynsha 5,59 mlrd teńge, dizel otyny boiynsha 15,75 mlrd teńge, al aviatsiialyq otyn boiynsha 8,61 mlrd teńge únemdeý josparlanyp otyr.
Kelisimniń qoldanylýyn qaita bastaý munai men munai ónimderin jetkizýdiń indikativti balansyn qalyptastyrý kezinde Qazaqstan men Resei arasyndaǵy yntymaqtastyqtyń halyqaralyq-quqyqtyq negizin de qamtamasyz etedi.
Quryltai málimetinshe, hattamany ratifikatsiialaý eki el arasyndaǵy saýda-ekonomikalyq bailanystardy jalǵastyrýmen qatar, Qazaqstannyń ishki munai ónimderi naryǵynyń turaqtylyǵyn saqtaýǵa jáne energetikalyq qaýipsizdigin qamtamasyz etýge múmkindik beredi.
