Қазақстанда офицер ойынға бәс тігіп, әскери бөлімнің мүлкін ломбардқа қойған

Қаракөз Амантай 09 шіл. 2024 15:40 4198

Семей гарнизоны Әскери соты өзіне сеніп тапсырылған бөтеннің мүлкін ысырып қылды деп айыпталған әскери бөлім офицеріне қатысты қылмыстық істі қарады, деп хабарлайды Dalanews.kz.

Сот мәліметінше, сотталушы О. штабтың топографиялық қызметінің бастығы бола тұра, өзінің қызметтік бабын пайдаланып, букмекерлік сайтта ставка қойып ұтылып, жеке басындағы қарыздардың көбеюіне байланысты пайдакүнемдік мақсатта әскери бөлімге тиесілі топографиялық құрылғыларды ломбардқа өткізген.

"Нәтижесінде мемлекетке 2 миллион теңгеден астам залал келтірілген. Сот үкімі бойынша, сотталушы О. ҚК-нің 189-бабы 3 бөлігінің 2) тармағымен кінәлі деп танылып, оған 2 жыл 6 ай мерзімге бас бостандығынан айыру түріндегі жаза тағайындалды", - дпелінген хабарламада.

ҚК-нің 49-бабы, 1-бөлігіне сәйкес "капитан" әскери атағынан айырылды. Сондай-ақ, сотталғаннан мемлекет пайдасына материалдық шығын мен мемлекеттік баж салығы өндірілді.

Үкім заңды күшіне енген жоқ.


Ұсынылған
Соңғы жаңалықтар