Қазақстан Президенті Қасым-Жомарт Тоқаев қытайлық China Daily басылымында жарияланған «Қазақстан мен Қытайдың берік әрі сенімді қарым-қатынасы - табысты ынтымақтастықтың кепілі» атты мақаласында екі елдің шекарасы туралы сөз қозғады, деп хабарлайды Dalanews.kz.
"Бізді бейбіт және тату көршіліктің символына айналған 1700 шақырымға созылатын ортақ шекара біріктіреді. Жоғары деңгейдегі сапарлар мен екі ел арасындағы белсенді саяси диалог мәңгілік әрі жан-жақты стратегиялық серіктестік рухын күшейте түседі.
Қытай әлемдік деңгейдегі көрнекті саясаткер саналатын Төраға Си Цзиньпиннің салиқалы басшылығымен таңғаларлық табыстарға қол жеткізді. Бұл жақын көршілеріне, соның ішінде Қазақстанға керемет тың мүмкіндіктерге жол ашып отыр", - дейді Мемлекет басшысы.
Болашағынан көп үміт күттіретін жаңа кезеңге қадам басқан кезде уақыт тезінен өткен серіктестігіміздің қаншалықты мықты әрі терең екенін түйсіну өте маңызды.
"Келешекке көз тіккен ортақ мұрат пен барлық бағытта ынтымақтастықты кеңейту арқылы соңғы жылдары өзара ықпалдастығымыз ерекше қарқын алғанына бәріміз куәміз. Жаһанды жайлаған экономикалық сын-қатерлерге қарамастан елдеріміздің сауда-экономикалық байланыстары айтарлықтай дамып келеді. 2024 жылы екіжақты сауда-саттық көлемі 44 миллиард долларға жетті. Бұл – тарихи меже. Осылайша, Қытай Қазақстанның ең ірі сауда-экономикалық серіктесі ретінде позициясын күшейтті.
2005 жылдан бері қытайлық кәсіпорындар Қазақстанға 27 миллиард доллардан астам инвестиция құйды. Бүгінгі таңда қытай капиталының үлесі бар алты мыңға жуық компания жұмыс істейді. Олар еліміздің технологиялық тұрғыдан дамуына ықпал етіп, өнеркәсіпті жаңғырту ісінде маңызды рөл атқарады", - дейді Президент.
