Президент Қасым-Жомарт Тоқаев Ұлыбританияның Сауда жөніндегі мемлекеттік министрі лорд Анас Сарвармен кездесіп, екі ел арасындағы сауда-экономикалық және гуманитарлық ынтымақтастықты кеңейту мәселелерін талқылады, деп хабарлайды dalanews.kz.
Ақордада өткен кездесуде Мемлекет басшысы Қазақстанның Ұлыбританиямен екіжақты қарым-қатынасты дамытуға айрықша мән беретінін атап өтті.
Тоқаев Қазақстан мен Ұлыбританияны сындарлы саяси диалог және түрлі деңгейдегі белсенді байланыстар біріктіретінін айтып, екі ел арасындағы ынтымақтастықты одан әрі кеңейтуге мүмкіндік бар екенін жеткізді.
Президенттің мәліметінше, Ұлыбритания Қазақстанның негізгі сауда және инвестициялық серіктестерінің бірі саналады. Былтыр екі ел арасындағы сауда айналымы 83 пайызға өсіп, 1,6 млрд доллардан асқан. Қазақстанда 500-ден астам британдық компания жұмыс істейді.
Мемлекет басшысы сауда-экономикалық байланыстарды дамыту үшін жаңа жобалар мен инвестициялармен қатар, халықаралық ортада жұмыс істей алатын білікті мамандар қажет екенін айтты. Осы орайда ол жастардың шет тілдерін, әсіресе ағылшын тілін меңгеруінің маңызын атап өтті.
Кездесу барысында Тоқаев Ұлыбритания Премьер-министрі Эндрю Бёрнэмге жылы лебізін жолдап, оны Қазақстанға сапармен келуге шақырды.
Өз кезегінде лорд Анас Сарвар Ұлыбританияның Қазақстанмен стратегиялық серіктестіктің дамуына көңілі толатынын жеткізді. Ол британдық бизнес жобаларды қолдап, елде қолайлы инвестициялық ахуал қалыптастырғаны үшін Президентке алғыс айтты.
«Бізді ашықтық, серіктестік, инновациялар, өзара сенім мен еркін сауда байланыстырады», - деді Ұлыбританияның Сауда жөніндегі мемлекеттік министрі.
Тараптар гуманитарлық байланыстарды нығайту, академиялық алмасуды кеңейту және бірлескен білім беру жобаларын жүзеге асыру мәселелерін де талқылады.
Сонымен қатар кездесуде энергетика, көлік-логистика, цифрландыру және жасанды интеллект салаларындағы ынтымақтастықты жандандыру перспективалары қаралды.
