Кейінгі жылдары қазақстандық медианарықта Оңтүстік Корея, Түркия контенті басымдыққа ие еді. Ал соңғы уақытта бұл қатарға Өзбекстан қосылды. Мұның бір дәлелі – таяуда Мәскеуде өткен Саида Мирзиееваның сапары аясында жарық көрген "Миссия" деректі жобасының жаңа шығарылымы, деп хабарлайды Dalanews.kz.
Бұл жобада көтерілген тақырыптар тек Өзбекстан мен Ресейге емес, бүкіл аймақ елдеріне, соның ішінде Қазақстанға да қатысты. Бағдарлама мәдениет, білім, медиа саласын қамти отырып, көрші халықтардың бір-бірімен гуманитарлық байланысын арттыруға ерекше мән берген.
Мирзиеева Мәскеуде Ресей Президенті әкімшілігінің өкілдерімен кездесіп, цифрлық қауіпсіздік, жалған ақпаратпен күрес, бірлескен медиа-жобалар мен жастардың бастамалары туралы сөз қозғады. Бұл мәселелер Қазақстан үшін де өзекті.
"Миссия" жобасы көршілес елдердің қарым-қатынасын, мәдени байланысын ешқандай пафоссыз, қарапайым әрі шынайы жеткізуімен ерекшеленіп отыр. Саида Мирзиеева бұл жобада шенеунік ретінде емес, екі ел арасындағы диалогтың дәнекері ретінде көрінеді.
Қазақстандық аудитория үшін де бұл тәсіл жақсы таныс әрі түсінікті. Себебі Қазақстанда да медиасфераны дамыту мен мәдени байланысты арттыру маңызды саналады. Өзбекстан қазір ақпараттық салада контент экспорттаушы елге айналып келеді. Бұл – медианарықтағы жаңа трендтің көрінісі.
Қазақстанда өзбек тіліндегі медиаконтентті тұтынушылар көбейген. Әлеуметтік желілерде өзбек фильмдері мен сериалдары қазақстандық көрермен арасында бұрын-соңды болмаған танымалдыққа ие. Тіпті, TikTok, Instagram сияқты платформаларда өзбек әндері мен сериалдарынан үзінділер миллиондаған қаралым жинап жатыр.
"Миссия" жобасы да Қазақстандағы көрерменге бағытталған. Бағдарлама мәдениет, білім және медиа салаларында ынтымақтастықты нығайтуға ықпал етіп, жастарды жаңа бастамаларға шабыттандырады.
Қазақстанның медианарығында мәдени-гуманитарлық контенттің артқаны анық байқалады. Бұл үрдіс Қазақстан мен Өзбекстан арасындағы қарым-қатынастың тек ресми деңгейде емес, халықтар арасында да жақындап келе жатқанын көрсетеді.
