Мәжіліс депутаты Еділ Жанбыршин қаңғыбас жануарларға қатысты заң жөніндегі ұстанымын өзгертпейтінін мәлімдеді, деп хабарлайды Dalanews.kz.

Депутаттың айтуынша, бұған дейін Facebook желісінде жариялаған пікірі өзгеріссіз қалады. Ол заңдағы барлық нормалар алдын ала әзірленгенін және онда мемлекет басшысы көтерген мәселелер ескерілгенін атап өтті.

Сонымен қатар Жанбыршин президенттің сөзін бұрмалауға болмайтынын айтып, заңға өзгеріс енгізілмейтінін жеткізді.

Ол бұған дейін елде жануарларды аулап, кейін қайта жіберу тәжірибесі қолданылғанын еске салды. Алайда депутаттың сөзінше, бұл тәсіл күткен нәтиже бермеген.

Осыған дейін жануарларды қорғаушы блогер Темірлан Тоспаев Қазақстан президентін жануарларға қатыгездік жасауға жол ашуы мүмкін нормалардың қабылдануына жол бермеуге шақырған еді.

Қазір Мәжілісте "Жануарларға жауапкершілікпен қарау туралы" заңға түзетулер талқыланып жатыр. Онда "аулау – зарарсыздандыру – вакцинациялау – қайта жіберу" әдісінен бас тарту ұсынылған.

Депутаттардың пікірінше, бұл модель қаңғыбас жануарлар санын азайтуда да, адамдарға шабуыл жағдайларын төмендетуде де тиімді болмаған.