ءماجىلىس دەپۋتاتى ەدىل جانبىرشين قاڭعىباس جانۋارلارعا قاتىستى زاڭ جونىندەگى ۇستانىمىن وزگەرتپەيتىنىن مالىمدەدى، دەپ حابارلايدى Dalanews.kz.

دەپۋتاتتىڭ ايتۋىنشا، بۇعان دەيىن Facebook جەلىسىندە جاريالاعان پىكىرى وزگەرىسسىز قالادى. ول زاڭداعى بارلىق نورمالار الدىن الا ازىرلەنگەنىن جانە وندا مەملەكەت باسشىسى كوتەرگەن ماسەلەلەر ەسكەرىلگەنىن اتاپ ءوتتى.

سونىمەن قاتار جانبىرشين پرەزيدەنتتىڭ ءسوزىن بۇرمالاۋعا بولمايتىنىن ايتىپ، زاڭعا وزگەرىس ەنگىزىلمەيتىنىن جەتكىزدى.

ول بۇعان دەيىن ەلدە جانۋارلاردى اۋلاپ، كەيىن قايتا جىبەرۋ تاجىريبەسى قولدانىلعانىن ەسكە سالدى. الايدا دەپۋتاتتىڭ سوزىنشە، بۇل ءتاسىل كۇتكەن ناتيجە بەرمەگەن.

وسىعان دەيىن جانۋارلاردى قورعاۋشى بلوگەر تەمىرلان توسپايەۆ قازاقستان پرەزيدەنتىن جانۋارلارعا قاتىگەزدىك جاساۋعا جول اشۋى مۇمكىن نورمالاردىڭ قابىلدانۋىنا جول بەرمەۋگە شاقىرعان ەدى.

ءقازىر ماجىلىستە "جانۋارلارعا جاۋاپكەرشىلىكپەن قاراۋ تۋرالى" زاڭعا تۇزەتۋلەر تالقىلانىپ جاتىر. وندا "اۋلاۋ – زارارسىزداندىرۋ – ۆاكسيناسيالاۋ – قايتا جىبەرۋ" ادىسىنەن باس تارتۋ ۇسىنىلعان.

دەپۋتاتتاردىڭ پىكىرىنشە، بۇل مودەل قاڭعىباس جانۋارلار سانىن ازايتۋدا دا، ادامدارعا شابۋىل جاعدايلارىن تومەندەتۋدە دە ءتيىمدى بولماعان.