Павлодар облысында жүргізілген тексеру барысында құрамында шошқа ДНҚ-сы анықталған шұжық өнімі табылды. Алайда бұл туралы ақпарат өнімнің қаптамасында көрсетілмеген, деп хабарлайды dalanews.kz.
Тексеру барысында не анықталды?
Павлодар облыстық санитариялық-эпидемиологиялық бақылау департаменті басшысының орынбасары Гүлнәр Ақылбекованың айтуынша, бақылау шаралары кезінде өнім құрамынан шошқа ДНҚ-сы табылғанымен, бұл мәлімет таңбалауында көрсетілмеген, деп жазады Obozrenie.kz. Әңгіме Беларусьте өндірілген сиыр етінен жасалған сервелат туралы болып отыр.
Өнім Алматыдағы көтерме қоймадан жеткізілген
Ведомство өкілінің мәліметінше, жүргізілген тексеру нәтижесінде аталған өнімді жеткізуші Алматы қаласындағы көтерме қойма екені анықталған. Осыған байланысты анықталған дерек бойынша тиісті шаралар қабылдау үшін ақпарат Алматы қаласының аумақтық санитариялық-эпидемиологиялық бақылау департаментіне жолданған.
Өнімнің құжаттары болған
Гүлнәр Ақылбекованың айтуынша, өнімге қолданыстағы сәйкестік декларациясы рәсімделген. Сондай-ақ оған қатысты барлық тауарға ілеспе құжаттар болған.
