Павлодар облысы әкімдігінің қарамағындағы мемлекеттік кәсіпорынның шотында үш жылдан астам уақыт бойы пайдаланылмай жатқан 2 млрд теңге “Қазақтелеком” компаниясына аударылды, деп хабарлайды Dalanews.kz.
Жоғары аудиторлық палатасының дерегінше, қазынашылық аудиторларының тексерісі нәтижесінде 2 млрд теңгеден астам қаржы бақылау шотында сақталып, ұзақ уақыт бойы игерілмегені анықталды.
“Павлодар облысы әкімдігіне бұл қаражаттың әрі қарай қолданылуын қамтамасыз ету тапсырылды. 18 наурыздағы жағдай бойынша 2 млрд теңгеден астам қаржы бұған дейін жасалған келісімшарт аясында “Қазақтелеком” АҚ-ға аударылды”, – делінген ресми хабарламада.
Қазір шотта қалған 114 млн теңгенің қайда жұмсалатыны қарастырылып жатыр.
“Бұл мәселе Жоғары аудиторлық палата бақылауында, мемлекеттік аудит қорытындысы бойынша берілген басқа да тапсырмалардың орындалуы сияқты”, – деп түйіндеді ведомство.
