Көлік министрі Нұрлан Сауранбаевтың айтуынша, астық тиелген шамамен 11 мың вагонның кідіруіне жүк тасымалының күрт артуы себеп болған, ал Өзбекстан мұндай ауқымдағы жүктемеге дайын емес, деп хабарлайды Dalanews.kz.

Нұрлан Сауранбаевтың сөзінше, бұған дейін шекара тәулігіне 24 пойызды қабылдай алатын. Алайда Ауғанстан тарапынан Ресей мен Қазақстаннан әкелінетін өнімдер мен тауарларға сұраныс артқандықтан, жүк көлемі тәулігіне 35 пойызға дейін көбейген.

«Оларда локомотивтер жетіспейді және басқа да мәселелер бар. Инфрақұрылымға көп қаражат салып жатыр, олар да дамып келеді. „Қазақстан темір жолы“ басшылығы сол жаққа барып, бұл мәселелерді талқылады. Мысалы, үш күн бұрын бізде дерлік 11,5 мың вагон болса, бүгін одан азырақ, 8 мыңға дейін кетіп жатыр. Жағдай жақсарып келеді, қабылдау көлемі ұлғайды», - деді министр.

Ол алдағы уақытта ахуалдың толық жақсаратынына сенімді екенін айтты.