Иракта отбасы мүшелері 15 жастағы Кавтар әл-Хусейджавиді туысына тұрмысқа шығудан бас тартқаны үшін өлтірген. Бұл оқиға туралы марқұм қыздың туыстарының бірі айтып берді. Ол қайғылы жағдайдан кейін көпшілік алдында сөйлеуге шешім қабылдаған, деп хабарлайды dalanews.kz.
Қыз Бағдад маңындағы елді мекенде тұрған. 13 жасында оны мектептен шығарып алып, өзінен едәуір үлкен ер адамға тұрмысқа берген. Кавтар отбасылық өмірде үнемі зорлық-зомбылық көрген. Бір жылдан кейін ол ажырасуға қол жеткізген.
Кейін отбасы оны қайтадан тұрмысқа бермек болған. Бұл жолы қызды түрмеден жақында шыққан немере ағасына қоспақ болған. Алайда Кавтар бұған қарсы шыққан. Бірақ туыстары оның шешімін қабылдамаған.
Мамыр айының басында қыз мәжбүрлі некеден қорқып, үйінен қашып кеткен. Бірнеше күннен кейін оны тауып алып, отбасына қайтарған. Марқұмның туысының айтуынша, қыздың әкесі, ағасы және болашақ күйеуі оны Бағдадтың шетіне алып барып, сол жерде өлтірген.
Оның сөзінше, қызға бірнеше рет оқ атылған, кейін оған балтамен соққы жасалған.
Қайғылы оқиғадан кейін әлеуметтік желілерде отбасының кейбір ер адамдары көшеде билеп жүрген видеолар тараған.
"Мен отбасында біреудің қайғырғанын көрмедім. Керісінше, ер адамдар "тойлағандай" болды", – деді марқұмның туысы.
Ол отбасының басқа әйелдерімен бірге болған жағдай туралы ақпаратты журналистер мен құқық қорғаушыларға бергенін айтты. Олардың мақсаты – осы істің толық тергелуіне қол жеткізу.
"Мені ең қатты шошытатыны – Иракта ер адамдар үшін адам өлтірудің тым оңай болып кеткені. Олар енді заңнан да, мемлекеттен де қорықпайды. Барлығы болған оқиғаны жасыруға тырысады. Сірә, адвокат іске кіріседі, денесі табылады, ал оның немере ағасы жалғыз кінәлі ретінде беріліп, іс "ар-намыс үшін жасалған қылмыс" ретінде жабылуы мүмкін", – деді Кавтардың туысы.
