Оңтүстік Кореяның Eastar Jet әуе компаниясы Инчхон мен Алматы арасына қатынайтын жаңа рейсті іске қоспақ, деп хабарлады Dalanews.kz.

Жаңа бағыт 2025 жылдың 7 сәуірінен бастап қолжетімді, ұшақ аптасына екі рет қатынайды: дүйсенбі және жұма күндері.

Мәселен, Boeing 737-8 жолаушылар ұшағы Инчхон халықаралық әуежайынан сағат 19:30-да ұшып шықса, Алматы қаласына сағат 22: 45-те келіп қонады екен. Кері рейс сағат 23:45-ке жоспарланған әрі ол келесі күні сағат 9:50-де Оңтүстік Кореяда болады. Осы жағынан алғанда, бұл - Eastar Jet әуе компаниясы үшін ең ұзақ уақытты алатын бағыттардың бірі.

Сәуір айына билетке тапсырма бергендерге жеңілдік бары айтылады. KGN резиденттері қос тарапқа 400 доллар жұмсайды,ал ұшу мамыр-маусым айларына жоспарланса,онда бағада, әрине өзгеріс болады: 450 доллар. Билет құнына 15 келіге дейінгі бір жүк орыны және салмағы 10 келіден аспауы тиіс қол сөмке де енеді.

Бәрінен бұрын, әуе тасымалы сапасына шағымы бар екі ел арасына жиі қатынайтын отандастарымыз үшін бұл жағымды жаңалық болары сөзсіз. 

Айта кетсек, бейресми деректер бойынша, Оңтүстік Кореяда бүгіндері шамамен 35 мың Қазақстан азаматы бар, оның 12 мыңы заңсыз жүрген көрінеді.