NASA әкімшісі Джаред Айзекман Байқоңыр ғарыш айлағына келді. Оның сапарының негізгі мақсаты – 14 шілдеде Халықаралық ғарыш станциясына (ХҒС) ұшырылатын «Союз МС-29» басқарылатын ғарыш кемесінің ұшырылымына қатысу, деп хабарлайды dalanews.kz.
Айзекман Байқоңырда «Роскосмос» мемлекеттік корпорациясының басшысы Дмитрий Бакановпен кездесіп, ғарышкерлер экипажын шығарып салды. Тараптар сондай-ақ екіжақты ынтымақтастықтың өзекті мәселелерін талқылады.
«Союз МС-29» миссиясының негізгі экипажының құрамына «Роскосмос» ғарышкерлері Петр Дубров пен Анна Кикина, сондай-ақ NASA астронавты Анил Менон енді. Олар орбитада 261 тәулік жұмыс істейді деп жоспарланған.
Джаред Айзекман NASA басшысы қызметіне 2025 жылы кіріскен. Ол биыл мамыр айында Ресей тарапымен Халықаралық ғарыш станциясының пайдалану мерзімі аяқталғанға дейінгі ынтымақтастықтың келешегін талқылауға ниетті екенін мәлімдеген болатын.
Байқоңырдағы кездесу соңғы сегіз жылдағы NASA мен «Роскосмос» басшылары арасындағы алғашқы тікелей байланыс болды. Сарапшылардың пікірінше, бұл басқарылатын ғарыш бағдарламалары бойынша диалогтың қайта жанданғанын көрсетеді. Ал Қазақстан әлемдік ғарыш саласындағы стратегиялық маңызы бар негізгі ұшыру алаңы ретіндегі рөлін сақтап отыр.
