Бұрынғы мәжіліс депутаты Мұрат Әбенов Air Astana компаниясының басқару саясатына қатысты сын айтып, компания басшылығының сыйақы көлеміне күмән келтірді, деп хабарлайды dalanews.kz.
Оның айтуынша, Air Astana өзін толықтай жекеменшік компания ретінде көрсеткенімен, оның дамуына мемлекет елеулі үлес қосқан. Әбенов компанияның ішкі әуе тасымалы нарығында ұзақ уақыт бойы басымдыққа ие болғанын атап өтті.
Экс-депутаттың мәліметінше, 2025 жылдың қорытындысында Air Astana тобының таза пайдасы 72,5%-ға төмендеп, 49,4 млн доллардан 13,6 млн долларға дейін қысқарған. Соған қарамастан, басқарма мүшелерінің жиынтық сыйақысы 31,6%-ға өсіп, 525,4 млн теңгеден 691,4 млн теңгеге жеткен.
Сондай-ақ ол 2024 жылғы халықтық IPO кезінде компания акцияларын Бірыңғай жинақтаушы зейнетақы қоры (БЖЗҚ) сатып алғанын еске салды. Әбеновтің айтуынша, орналастыру кезінде акция бағасы 1073,83 теңге болған, ал қазір олардың құны шамамен 680–690 теңге деңгейінде саудаланып жатыр.
Осыған байланысты ол БЖЗҚ мен мемлекеттік органдардың әрекетіне қатысты сұрақтар қойды.
«Пайда азайып, акциялар құнсызданып жатқан кезде басшылықтың сыйақысы неге өсіп отыр? Қарапайым азаматтардың зейнетақы жинақтары есебінен сатып алынған активтердің құны төмендесе, бұл жағдайға кім жауап береді?» – деп жазды Мұрат Әбенов.
Сондай-ақ ол «Самұрық-Қазына» қорының, БЖЗҚ мен Көлік министрлігінің бұл мәселеге қатысты ұстанымын жария түрде түсіндіру қажеттігін айтты.
