Қазақстанда алғаш рет жеңіл автомобильдерді лизингке алу жеке тұлғаларға да қолжетімді болып отыр – бұған дейін бұл құралды тек заңды тұлғалар ғана пайдалана алатын, деп хабарлайды Dalanews.kz. 

Мұндай мүмкіндік ішкі сауда саласын реттейтін ережелерге енгізілген өзгерістерден кейін пайда болды.

Инициативалық жобаны іске қосу туралы шешім Өнеркәсіп және құрылыс министрлігі алаңында өткен кеңестің қорытындысы бойынша қабылданды. Жиынға Мәжіліс депутаты Олжас Күсіпбеков, банк секторы мен лизингтік ұйымдардың өкілдері қатысты. Жобаның мақсаты – жаңа құралдың іс жүзіндегі жұмысын тексеру және азаматтар арасындағы сұраныс әлеуетін бағалау.

Бастаса ForteLeasing және қазақстандық Allur автомобиль компаниясының қатысуымен жүзеге асырылуда. Бастапқы кезеңде жеке клиентке Kia Soluto көлігі рәсімделді. Алдын ала шарттар бойынша жылдық пайыздық мөлшерлеме – 15%, бастапқы жарна – 10%-дан басталады. Бұл – Kia Qazaqstan дистрибуциясының жобаны іске қосу аясындағы арнайы ұсынысы. Қорытынды реттеу моделі бекітілгеннен кейін бұл параметрлер өзгеруі мүмкін. Мөлшерлеме қарыз алушының тұрақтылығы мен төлем қабілетіне байланысты белгіленеді.

«Бұл – нарық үшін маңызды кезең. Ол халықтың автомобиль сатып алудың баламалы құралдарына қолжетімділігін кеңейтуге мүмкіндік береді. Жобаның бастапқы кезеңі клиенттердің нақты қажеттілігін көруге, рәсімдеудің қолайлығын бағалауға және бағдарламаны әрі қарай енгізу үшін практикалық ұсыныстар әзірлеуге жол ашады», – деді ForteLeasing басқарма төрағасы Талап Рахманов.

Kia тарапы да жобаның маңыздылығын атап өтті.

«Kia бренді үшін жеке тұлғаларға арналған автолизинг бағдарламасына қатысу – Қазақстандағы брендтің танымалдығын арттыруға бағытталған маңызды қадам. Біз желіні жаңа Kia Soluto қолжетімді седанымен толықтырдық, ол жеке клиенттерге арналған лизинг форматына өте жақсы сәйкес келеді. Бағдарламаның жаңа автомобильдерді халыққа қолжетімді етуге барлық мүмкіндігі бар», – деді Kia дистрибуциясының Қазақстандағы директоры Данияр Оразбаев.

Жоба аясындағы алғашқы келісім операциялық үдерістерді тексеруге, ықтимал шектеулерді анықтауға және механизмді одан әрі кеңейту үшін ұсыныстар әзірлеуге мүмкіндік береді. Нәтижелер талданғаннан кейін жеке тұлғаларға арналған лизингті басқа модельдер мен брендтерге де тарату мүмкіндігі қарастырылмақ.