قازاقستاندا العاش رەت جەڭىل اۆتوموبيلدەردى ليزينگكە الۋ جەكە تۇلعالارعا دا قولجەتىمدى بولىپ وتىر – بۇعان دەيىن بۇل قۇرالدى تەك زاڭدى تۇلعالار عانا پايدالانا الاتىن، دەپ حابارلايدى Dalanews.kz. 

مۇنداي مۇمكىندىك ىشكى ساۋدا سالاسىن رەتتەيتىن ەرەجەلەرگە ەنگىزىلگەن وزگەرىستەردەن كەيىن پايدا بولدى.

ينيسياتيۆالىق جوبانى ىسكە قوسۋ تۋرالى شەشىم ونەركاسىپ جانە قۇرىلىس مينيسترلىگى الاڭىندا وتكەن كەڭەستىڭ قورىتىندىسى بويىنشا قابىلداندى. جيىنعا ءماجىلىس دەپۋتاتى ولجاس كۇسىپبەكوۆ، بانك سەكتورى مەن ليزينگتىك ۇيىمداردىڭ وكىلدەرى قاتىستى. جوبانىڭ ماقساتى – جاڭا قۇرالدىڭ ءىس جۇزىندەگى جۇمىسىن تەكسەرۋ جانە ازاماتتار اراسىنداعى سۇرانىس الەۋەتىن باعالاۋ.

باستاسا ForteLeasing جانە قازاقستاندىق Allur اۆتوموبيل كومپانياسىنىڭ قاتىسۋىمەن جۇزەگە اسىرىلۋدا. باستاپقى كەزەڭدە جەكە كليەنتكە Kia Soluto كولىگى راسىمدەلدى. الدىن الا شارتتار بويىنشا جىلدىق پايىزدىق مولشەرلەمە – 15%، باستاپقى جارنا – 10%-دان باستالادى. بۇل – Kia Qazaqstan ديستريبۋسياسىنىڭ جوبانى ىسكە قوسۋ اياسىنداعى ارنايى ۇسىنىسى. قورىتىندى رەتتەۋ مودەلى بەكىتىلگەننەن كەيىن بۇل پارامەترلەر وزگەرۋى مۇمكىن. مولشەرلەمە قارىز الۋشىنىڭ تۇراقتىلىعى مەن تولەم قابىلەتىنە بايلانىستى بەلگىلەنەدى.

«بۇل – نارىق ءۇشىن ماڭىزدى كەزەڭ. ول حالىقتىڭ اۆتوموبيل ساتىپ الۋدىڭ بالامالى قۇرالدارىنا قولجەتىمدىلىگىن كەڭەيتۋگە مۇمكىندىك بەرەدى. جوبانىڭ باستاپقى كەزەڭى كليەنتتەردىڭ ناقتى قاجەتتىلىگىن كورۋگە، راسىمدەۋدىڭ قولايلىعىن باعالاۋعا جانە باعدارلامانى ءارى قاراي ەنگىزۋ ءۇشىن پراكتيكالىق ۇسىنىستار ازىرلەۋگە جول اشادى»، – دەدى ForteLeasing باسقارما ءتوراعاسى تالاپ راحمانوۆ.

Kia تاراپى دا جوبانىڭ ماڭىزدىلىعىن اتاپ ءوتتى.

«Kia برەندى ءۇشىن جەكە تۇلعالارعا ارنالعان اۆتوليزينگ باعدارلاماسىنا قاتىسۋ – قازاقستانداعى برەندتىڭ تانىمالدىعىن ارتتىرۋعا باعىتتالعان ماڭىزدى قادام. ءبىز جەلىنى جاڭا Kia Soluto قولجەتىمدى سەدانىمەن تولىقتىردىق، ول جەكە كليەنتتەرگە ارنالعان ليزينگ فورماتىنا وتە جاقسى سايكەس كەلەدى. باعدارلامانىڭ جاڭا اۆتوموبيلدەردى حالىققا قولجەتىمدى ەتۋگە بارلىق مۇمكىندىگى بار»، – دەدى Kia ديستريبۋسياسىنىڭ قازاقستانداعى ديرەكتورى دانيار ورازبايەۆ.

جوبا اياسىنداعى العاشقى كەلىسىم وپەراسيالىق ۇدەرىستەردى تەكسەرۋگە، ىقتيمال شەكتەۋلەردى انىقتاۋعا جانە مەحانيزمدى ودان ءارى كەڭەيتۋ ءۇشىن ۇسىنىستار ازىرلەۋگە مۇمكىندىك بەرەدى. ناتيجەلەر تالدانعاننان كەيىن جەكە تۇلعالارعا ارنالعان ليزينگتى باسقا مودەلدەر مەن برەندتەرگە دە تاراتۋ مۇمكىندىگى قاراستىرىلماق.