Жоспар бойынша «Жасыл белдеу» аймағында 2019-2021 жылдар аралығында көшеттер отырғызып, орман алқабын көбейту арқылы жасыл аймақ қалыптастыру жоспарланған.
Осы орайда, 2019 жылдың көктемінде 160 мың көшет отырғызылса, күзгі мезгілде 2000 гектар жерге 478 мың көшет және 300 гектар тәлімбақта 400 мыңға жуық сеппе көшет отырғызу жоспарда бар.
Жасыл белдеудің жалпы аумағы 7700 гектар жерді құрайды. Соның ішінде 7500 гектар жерге 3,5 млн екпе ағаш пен 500 мыңға жуық бұталы өсімдіктер егілмек.
Атап айтқанда, ұсақжапырақты шегіршін, үлкенжапырақты шегіршін, қарағай, жіңішкежапырақты жиде, терек, үйеңкі, қытай шағаны, сүйелді қайың, емен, сарғылт қарақат егілмекші.
«Жасыл белдеу» аймағына кіретін жерлердің орманға жарамсыздығын ескере отырып, аладғы уақытта 7700 гектар жерде жобалау-іздестіру жұмыстарының төрт кезеңі жүзеге асырылмақ.
2020 жылдан бастап, ғылыми зертханаларды тарта отырып, облыс әкімдігі тарапынан «Жасыл белдеудегі» тәлімбақта Түркістан қаласының климатына тез бейімделетін екпе көшет және көпжылдық гүлдейтін шөптерді сұрыптау бойынша жұмыстар атқарылатын болады.
Келер жылдың көктемінде тәлімбақта облыста және елімізде жоқ, өзге мемлекеттерде өсетін өсімдіктерді жерсіндіру бойынша тәжірибе жасау жоспарланып отыр. Бұл өз кезегінде кейбір қылқанжапырақты тұқымдас түрлерін Түркістан қаласының айналасындағы «Жасыл белдеуде» өсіру үшін бейімдеу мақсатында жүзеге аспақ.
Түркістан облысы әкімінің баспасөз қызметі
