Елде білім гранты бойынша өз міндеттемесін орындамаған түлектерден осы уақытқа дейін 7 миллиард теңге өндірілген, деп хабарлайды dalanews.kz Almaty.tv-ға сілтеп.
Заңға сәйкес мемлекеттен тегін оқуға мүмкіндік алған студенттер білімін толықтырғаннан кейін мамандығы мен бағдарлама түріне қарай өз бағыты бойынша кемінде үш жыл жұмыс істеуге міндетті. Белгіленген талап орындалмаған жағдайда олардың оқуына жұмсалған қаражат қайтарып алынуы мүмкін.
Білім гранты тек мүмкіндік емес, үлкен жауапкершілік те жүктейді. Заң бойынша мемлекеттен тегін оқуға мүмкіндік алған түлектер дипломын алған соң мамандығымен кемінде үш жыл еңбек етуге тиіс. Қазір осы талапты орындауға міндетті 350 мыңға жуық азамат бар. Ал еңбек міндеттемесін сақтамай, жұмыс орнын растамағандардың саны 6 мыңнан асады. Тиісті талап орындалмаса, мемлекет оқуға жұмсалған қаражатты өндіріп алуы мүмкін.
"Ауылдық квота щеңберінде бітірген педагог мамандықтар үшін талап - ауылдық елдімекендегі білім мекемелерінде жұмыс істеу. Одан бөлек, жалпы конкурс бойынша түскен педагог, медицина мамандықтары үшін де талап бар", - деді Қаржы орталығы АҚ мониторинг департаментінің жетекші маманы Ақзира Серікқали.
Мамандардың айтуынша, кейінгі жылдары еңбек міндеттемесін орындамаған түлектерден мемлекет қазынасына 7 миллиард теңгеге жуық қаражат өндірілген.
