Алматы қаласы Мәдениет басқармасының басшысы Ғани Майлыбаев жаңа қызметке тағайындалды, деп хабарлайды Dalanews.kz.
"Алматы облысы әкімінің өкімімен Ғани Айдарұлы Майлыбаев 2025 жылдың 3 қазанынан бастап Алматы облысы әкімінің орынбасары лауазымына тағайындалды", - делінген Алматы облысы әкімдігі таратқан ресми хабарламада.
Еске салайық, бұған дейін Dalanews.kz агенттігі шенеуніктің жаңа қызметке баратынын мәлімдеген еді.
Айта кетейік, жақында Алматы облысы әкімінің орынбасары Нұрлан Әбдірахым Алматы қаласы әкімінің орынбасары қызметіне келді.
Майлыбаевтың еңбек жолы
Ғани Майлыбаев 1987 жылы 10 қыркүйекте дүниеге келген. Ол Абай атындағы Қазақ ұлттық педагогикалық университетін, РФ Президенті жанындағы Ресей халық шаруашылығы және Мемлекеттік қызмет академиясын бітірген.
Еңбек жолын 2008 жылы Nur Otan партиясының Алматыдағы Бостандық аудандық филиалының бас бухгалтері қызметінен бастаған.
Түрлі жылдары партияның Алатау аудандық филиалында заң кеңесшісі, кеңесші болып жұмыс істеді.
2014-2015 жылдары Nur Otan партиясы Медеу аудандық филиалы төрағасының бірінші орынбасары болды.
2015-2019 жылдары Алматы қаласы Медеу ауданы әкімінің орынбасары қызметін атқарған.
2019-2020 жылдары Наурызбай ауданы әкімінің орынбасары болды.
2020 жылға дейін ол Жамбыл облысы әкімдігі туризм басқармасының басшысы болып жұмыс істеді.
