АҚШ ғалымдары адамның иммундық жүйесін АИТВ вирусын дәрі-дәрмексіз-ақ бақылауға үйрету бағытында маңызды нәтижеге қол жеткізді, деп хабарлайды dalanews.kz.
Bloomberg басылымының мәліметінше, АИТВ инфекциясын зерттеуші жетекші ғалымдардың бірі Стивен Дикс жүргізген тәжірибе барысында 10 адам антиретровирустық терапияны дәрігерлердің қатаң бақылауымен тоқтатқан. Зерттеу нәтижесінде қатысушылардың 10-ының 7-сінде вирус деңгейін ем-домсыз бақылауда ұстау мүмкін болған. Ал бір қатысушыда АИТВ вирусы 18 айдан астам уақыт бойы дәрі қабылдамай-ақ басылған күйде сақталған.
Ғалымдардың айтуынша, зерттеу ауқымы әзірге шағын және қолданылған әдісті кең көлемде енгізу оңай емес. Соған қарамастан, бұл тәжірибе АИТВ инфекциясын ұзақ уақыт бойы тұрақты терапиясыз бақылауда ұстауға болатынын көрсеткен.
Мамандардың келесі мақсаты – осы эксперименттік тәсілді қарапайым әрі қолжетімді емдеу әдісіне айналдыру.
Қазіргі уақытта АИТВ жұқтырған адамдардың басым бөлігі вирусты бақылауда ұстау үшін өмір бойы антиретровирустық препараттарды қабылдауға мәжбүр. Сондықтан жаңа зерттеу болашақта емдеу тәсілдерін түбегейлі өзгертуі мүмкін.
