Қазақстан мен Франция Іле-Балқаш бассейнін зерттейді, - деп хабарлайды Dalanews.kz.
Су ресурстары және ирригация министрі Нұржан Нұржігітов Францияның Қазақстандағы төтенше және өкілетті елшісі Сильван Гиогемен кездесіп, екіжақты ынтымақтастық бағыттарын талқылады. Министрлік Францияның даму агенттігімен (AFD) және Францияның геологиялық және тау-кен зерттеулер бюросымен (BRGM) ынтымақтастық туралы меморандумға және үшжақты келісімге қол қоюға дайындалып жатыр.
Ведомство бұл ұйымдармен бірлесіп, Іле-Балқаш бассейніне кешенді зерттеу жүргізеді. Сондай-ақ, жерасты суларын зерттеу, мониторинг, барлау және игеру бағытында да ынтымақтастық жолға қойылады.
Бұдан бөлек, Су ресурстары және ирригация министрлігі Халықаралық су бюросымен (OiEau) ынтымақтастық мүмкіндіктерін қарастырып жатыр. Сильван Гиоге өз кезегінде француз компаниялары Қазақстанда су шаруашылығы құрылыстарын салу және реконструкциялау бойынша жобаларға қатысуға ниетті екенін айтты.
Сондай-ақ, су шығынын анықтайтын және суды басқаруды оңтайландыратын компаниялар да серіктестік орнатуға қызығушылық танытып отыр.
«Меморандум мен келісімге қол қою біздің ынтымақтастығымыз үшін маңызды қадам болмақ. Біз француз әріптестерімізбен ұзақ мерзімді және нәтижелі жұмыс істеуге ниеттіміз»,- деді Су ресурстары және ирригация министрі Нұржан Нұржігітов.
