Еуропада соңғы бір аптада аптап ыстық салдарынан 1300-ден астам адам қайтыс болды. Бұл туралы Дүниежүзілік денсаулық сақтау ұйымының (ДДҰ) бас директоры Тедрос Адханом Гебрейесус X әлеуметтік желісінде мәлімдеді, деп хабарлайды dalanews.kz.
Оның айтуынша, 21 маусымнан бері Еуропада жоғары температураға байланысты 1300-ден астам қосымша өлім тіркелген.
«Аптап ыстықты көбіне "үнсіз өлтіруші" деп атайды. Еуропадағы тұрғын үйлер, жұмыс орындары мен мектептер мұндай жоғары температураға бейімделіп салынбаған. ДДҰ мүше мемлекеттермен және серіктестерімен бірге экстремалды ыстықтың денсаулыққа әсерін азайту бағытында жұмыс істеп жатыр. Негізгі назар дайындыққа, алдын алу шараларына және денсаулық сақтау жүйесінің әрекет ету қабілетін күшейтуге аударылған», – деді ұйым басшысы.
Гебрейесус сондай-ақ Еуропа климаттың жылынуы ең жылдам жүріп жатқан құрлық екенін атап өтті. Оның сөзінше, мұндағы температураның өсу қарқыны әлемдік орташа көрсеткіштен екі есе жоғары.
РИА Новости агенттігінің мәліметінше, маусым айының ортасынан бастап Еуропада аномальды ыстық орнаған. Кейбір елдерде ауа температурасы 40 градустан асып кеткен. Ал Франция, Ұлыбритания, Нидерланд және Италияда ауа райына байланысты ең жоғары – қызыл деңгейдегі қауіп жарияланған.
