Eýropada sońǵy bir aptada aptap ystyq saldarynan 1300-den astam adam qaitys boldy. Bul týraly Dúniejúzilik densaýlyq saqtaý uiymynyń (DDU) bas direktory Tedros Adhanom Gebreiesýs X áleýmettik jelisinde málimdedi, dep habarlaidy dalanews.kz.
Onyń aitýynsha, 21 maýsymnan beri Eýropada joǵary temperatýraǵa bailanysty 1300-den astam qosymsha ólim tirkelgen.
«Aptap ystyqty kóbine "únsiz óltirýshi" dep ataidy. Eýropadaǵy turǵyn úiler, jumys oryndary men mektepter mundai joǵary temperatýraǵa beiimdelip salynbaǵan. DDU múshe memlekettermen jáne seriktesterimen birge ekstremaldy ystyqtyń densaýlyqqa áserin azaitý baǵytynda jumys istep jatyr. Negizgi nazar daiyndyqqa, aldyn alý sharalaryna jáne densaýlyq saqtaý júiesiniń áreket etý qabiletin kúsheitýge aýdarylǵan», – dedi uiym basshysy.
Gebreiesýs sondai-aq Eýropa klimattyń jylynýy eń jyldam júrip jatqan qurlyq ekenin atap ótti. Onyń sózinshe, mundaǵy temperatýranyń ósý qarqyny álemdik ortasha kórsetkishten eki ese joǵary.
RIA Novosti agenttiginiń málimetinshe, maýsym aiynyń ortasynan bastap Eýropada anomaldy ystyq ornaǵan. Keibir elderde aýa temperatýrasy 40 gradýstan asyp ketken. Al Frantsiia, Ulybritaniia, Niderland jáne Italiiada aýa raiyna bailanysty eń joǵary – qyzyl deńgeidegi qaýip jariialanǵan.
