Қырғызстандық депутат Дастан Бекешев жалғызбасты аналарға жұмыс күнін бір сағатқа қысқарту мүмкіндігін қарастыруды ұсынды, деп хабарлайды dalanews.kz.
Оның айтуынша, бүгінде елдегі көптеген әйелдер балаларын ешкімнің көмегінсіз тәрбиелеп, барлық жауапкершілікті өз мойнына алып отыр.
«Олар әрі жұмыс істейді, әрі бала тәрбиесімен айналысады. Көбінің бала күтуші жалдауға мүмкіндігі жоқ, сондықтан барлық ауыртпалық аналардың иығына түседі. Олар күнделікті тіршілік үшін күресіп жүр. Көп жағдайда жұмыстан сұранып кетуге мәжбүр болады. Сондықтан жаңа Еңбек министрі жалғызбасты аналарға жұмыстан бір сағат ерте кетуге рұқсат беру мәселесін қарастыруы керек деп ойлаймын», – деді депутат.
Сонымен қатар Бекешев бала асырап алу рәсімдерін жеңілдету қажеттігін де айтты. Оның сөзінше, қазіргі таңда балалар үйлерінде тәрбиеленіп жатқан балалар әлі де көп. Сондықтан жаңа министр бұл бағыттағы рәсімдерді жеңілдетуге назар аударуы тиіс.
Депутаттың пікірінше, бұл шаралар жалғызбасты аналарды қолдауға және жетім балалардың отбасында тәрбиелену мүмкіндігін арттыруға көмектеседі.
