Әлемдік нарықта Brent маркалы мұнайдың бағасы барреліне 100,7 долларға дейін көтерілді. Бұл бір тәулікте 7%-ға өскенін білдіреді, деп хабарлайды dalanews.kz.
Бағаның күрт қымбаттауына Қызыл теңіздегі мұнай танкерлеріне жасалған шабуылдар және Парсы шығанағынан мұнай жеткізілімінің тұрақтылығына қатысты алаңдаушылықтың күшеюі себеп болды.
Goldman Sachs сарапшылары егер Ормуз бұғазы арқылы кеме қатынасы 2027 жылдың соңына дейін қиын күйінде қалса, Brent мұнайының бағасы 2026 жылдың төртінші тоқсанында барреліне 120 доллардан да жоғары болуы мүмкін деп болжайды. Сонымен қатар инвестициялық банк келесі жылы мұнайдың орташа бағасы 100 доллар деңгейінде қалыптасады деген болжам жасап отыр.
Ал Қазақстан Ұлттық банкі жүргізген сауалнамаға қатысқан сарапшылардың бағалауынша, 2026 жылы Brent мұнайының орташа бағасы барреліне 84,6 долларды құрайды. Ал 2027 жылы – 75 доллар, 2028 жылы – 71,8 доллар болады деп күтіледі.
