Алматы қаласындағы BNC Plaza бизнес-орталығының жер учаскесі соңғы жылдары көпшілік назарында тұр. Болат Назарбаевтың бұрынғы әйелі Майра Құрманғалиева мен оның әпкесі Гүлжамал 1999 жылы жасалған мәмілені қайта қарауды сұрап, сотқа арыз түсірген. Олардың айтуынша, Болат Назарбаев осы мәміле арқылы олардың әкесі Құрманғали Саудабаевтан заңсыз жер алған, деп хабарлайды Dalanews.kz.

Қорғаушылардың пікірінше, мәміле кезінде келісімшарт жасалған құжаттың заңсыз екені байқалған. Нотариус құжатты бекітпеген, мөрде қате бар, ал Саудабаевтың жерге меншік құқығы болған жоқ. Қазір аталған жер учаскесі Болат Назарбаевтың ұлы Нұрбол Назарбаевқа тиесілі заңды тұлғаға көшкен, ал объект мұралық мүліктен шығарылған.

Сот бұл істі бірнеше рет қараудан бас тартқан, себебі 15 ықтимал мұрагердің әрқайсысының мұра алғаны туралы куәліктері жоқ. Дегенмен заңгерлердің айтуынша, бұл объект заңды түрде мұрагерлермен байланыспайды.

Талап-арыз бірнеше рет қайтарылған, бірақ құжаттар қоса берілген. Сонымен қатар талапкерлер сотты алдын ала шешім шығару мен істі созбалаңға салғаны үшін де айыптап отыр. Себебі бұған дейін Назарбаевтар отбасының пайдасына осындай даулар шешілген болатын.