Депутат Аманжол Әлтай Мәжіліс мінберінде қарттар үйінің мәселесін көтерді, – деп хабарлайды Dalanews.kz.

Оның сөзінше, қоғамда қартайған ата-анасына жатсына қарайтын безбүйрек ұл мен кесірлі келін, тасжүрек немерелер көбейіп барады. Соның кесірінен қартайған кісілер бойдан қуат, білектен күш кеткен, кәрілік алқымдаған егде шағында іштен шыққан өз баласына өгей болып қарттар үйін паналайды.

“Қарты бар үйдің - қазынасы бар" деген құндылықтың мәнін ұқпаған жетесіз ұрпақ көбейіп отыр. Өз баласы өзекке теуіп, өксігі ұлғайған, көкірегіне шер байланған шерменде қарттардың барлығы асыраушы балалары жоқ тұл адамдар емес.

Қарттар үйін паналағандардың ішінде балалары лауазымды қызмет атқаратын, кәсіппен айналысатын, ұрпақтары бақуатты тұратын бейбақтар да бар", - деді ол.

Осы тұста депутат маңызды бастама көтерді.

"Қарттар үйін паналауға мәжбүр болған қариялардың дәрі-дәрмегі, шипажайларда емделуі, тағы басқа материялдық қажеттілігі үшін өмірдегі ең қымбатты ата-анасын керексіз қылған көкек балаларының табысынан ұстап отыруды ұсынамын", - деді Аманжол Әлтай.

Ресми дерек бойынша елімізде арнайы әлеуметтік қызмет көрсету бойынша 45 мемлекеттік орталық (қарттар үйлері) жұмыс істейді.

Еңбек және халықты әлеуметтік қорғау министрлігінің мәліметіне сүйенсек, 2024 жылғы 31 шілдедегі жағдай бойынша осы орталықтарда 5,9 мың егде жастағы адам бар.