Алматы облысында кәсіпкер серіктесін өлтіріп, көлігімен бірге өртеп жіберген, – деп хабарлайды Dalanews.kz "КТК" телеарнасына сілтеп.
Телеарна мәліметінше, жанып кеткен көлік пен ішіндегі мәйіт Қарасай ауданындағы демалыс орны маңынан табылған. Оқиға орнында өртке оранған көліктің бөлшектері ғана қалған.
Полицейлер қылмыстық іс қозғап, көп ұзамай 43 жастағы күдіктіні ұстады. Қазір ол уақытша ұстау изоляторында.
"Жедел іздестіру іс-шаралары барысында 43 жастағы күдікті ұсталып, қамауға алынды. Қазір қылмыстың барлық мән-жайын зерттеуге бағытталған тергеу жүргізіліп жатыр", - деді Алматы облысы ПД ресми өкілі.
Мәліметтерге қарағанда, екі ер адам ортақ кәсіптеріне байланысты жанжалдасып қалған. Яғни жүк тасымалдаумен айналысатын серіктестер табыстарын бөлісе алмаса керек. Кейін күдікті серіктесін балғамен ұрып, іле-шала көлігімен қоса өртеп жіберіпті.
Айта кетейік, ер адамның кінәсі дәлелденсе, оған 15 жылға дейін бас бостандығынан айырылу жазасы төніп тұр.
