Қазақстан баспасөз еркіндігі рейтингінде сегіз сатыға төмендеді, деп хабарлайды Dala News.

Халықаралық "Репортеры без границ" ұйымының 2026 жылғы индексіне сәйкес, Қазақстан 180 елдің ішінде 149-орынға тұрақтап, 34,41 балл жинаған.

«Индекс 2026. 149 из 180. Оценка: 34,41», - делінген есепте.

Осылайша, ел бір жыл ішінде сегіз позицияға төмендеді. 2025 жылы Қазақстан 141-орында болған.

Ұйым есебінде Қазақстандағы жағдайдың өзгеріп жатқаны, бірақ қысымның жаңа формалары күшейгені атап өтіледі.

«Онлайн жаңалықтардың сапасы жақсарып жатқанымен, баспасөзге қысым модернизациялануда. Интернетке бақылау күшейіп келеді, бұл тәуелсіз медианың пікір білдіре алатын жалғыз алаңы болып отыр», -  делінген баяндамада.

Аймақта Қазақстан көршілес елдермен шамалас деңгейде қалып отыр. Қырғызстан 146-орында, Өзбекстан 147-орында, Тәжікстан 155-орында орналасқан.

Посткеңестік кеңістікте ең төмен нәтиже Түрікменстанға тиесілі – 173-орын. Ресей 172-орында, Беларусь 165-орында, Әзербайжан 171-орында тұр.

Украина 55-орынға ие болып, 66,1 балл жинаған.

Ал әлемде баспасөз еркіндігі ең жоғары елдер ретінде Норвегия, Нидерланды және Эстония аталды.

Қорытындылай келе, Қазақстан рейтингте төмендеп, медиаға қысымның сақталып отырғаны халықаралық деңгейде тағы да тіркелді.