Украина Әзербайжаннан газ ала бастады. Бұл жөнінде "Нафтогаз" компаниясының басқарма төрағасы Сергей Корецкий әлеуметтік желідегі парақшасында жазды, деп хабарлайды Dalanews.kz.
Оның айтуынша, газ жеткізу Трансбалқан дәлізі арқылы, нақтырақ айтқанда Болгария – Румыния – Украина шекаралары бағытында сынақ режимінде жүзеге асып жатыр.
"Бұл – шағын болса да, стратегиялық маңызы бар қадам. Ол болашақта ұзақ мерзімді серіктестікке негіз қалап, газ жеткізу бағыттарын әртараптандыруға және Украинаның энергетикалық қауіпсіздігін күшейтуге мүмкіндік береді", – деп жазды Корецкий Facebook парақшасында.
Айта кетейік, Әзербайжан мен Ресей арасындағы қарым-қатынас ушығып тұрған кезеңде Баку Киевке газ жеткізуді бастап отыр.
