Атырау облысында түн ішінде халық эвакуацияланып, сирена қосылды

Сағыныш Сардарова 23 мам. 2024 09:30 3436

Атырау облысы Жалғансай ауылының маңында түнде Жайық өзенінің жайылмаларында су деңгейі көтерілді. Құтқарушылар сирена-сөйлеу құрылғыларын пайдалана отырып, жергілікті тұрғындарды хабардар етті, - деп хабарлайды Dalanews.kz.

Кейінірек Жалғансай ауылын су басу қаупіне байланысты халық Махамбет ауылына алдын ала эвакуацияланды.

"Уақытша эвакуациялау пункті жергілікті мектепте орналасқан. Сағат 02:30-дегі жағдай бойынша мұнда 99 адам орналастырылды, оның 63-і - балалар", - деп хабарлады түнде ТЖМ.

Бүгін ТЖМ тұрғын үйлерді су басуға жол берілмегенін хабарлады. Авариялық-құтқару жұмыстарына 812 адам жұмылдырылған. Олар - Атырау, Түркістан, Қызылорда, Маңғыстау және Алматы облыстарынан келген құтқарушылар тобы, ТЖМ және ҚМ әскери қызметшілері, еріктілер, ІІМ және жергілікті әкімдік қызметкерлері.

Айта кетейік, жол төсемінің бойында ұзындығы 800 м және биіктігі шамамен 1,5 м бөгет тұрғызылған. Су айдау жұмыстары жалғасып жатыр.


Ұсынылған
Соңғы жаңалықтар