اتىراۋ وبلىسى جالعانساي اۋىلىنىڭ ماڭىندا تۇندە جايىق وزەنىنىڭ جايىلمالارىندا سۋ دەڭگەيى كوتەرىلدى. قۇتقارۋشىلار سيرەنا-سويلەۋ قۇرىلعىلارىن پايدالانا وتىرىپ، جەرگىلىكتى تۇرعىنداردى حاباردار ەتتى، - دەپ حابارلايدى Dalanews.kz.
كەيىنىرەك جالعانساي اۋىلىن سۋ باسۋ قاۋپىنە بايلانىستى حالىق ماحامبەت اۋىلىنا الدىن الا ەۆاكۋاسيالاندى.
"ۋاقىتشا ەۆاكۋاسيالاۋ پۋنكتى جەرگىلىكتى مەكتەپتە ورنالاسقان. ساعات 02:30-دەگى جاعداي بويىنشا مۇندا 99 ادام ورنالاستىرىلدى، ونىڭ 63ء-ى - بالالار"، - دەپ حابارلادى تۇندە تجم.
بۇگىن تجم تۇرعىن ۇيلەردى سۋ باسۋعا جول بەرىلمەگەنىن حابارلادى. اۆاريالىق-قۇتقارۋ جۇمىستارىنا 812 ادام جۇمىلدىرىلعان. ولار - اتىراۋ، تۇركىستان، قىزىلوردا، ماڭعىستاۋ جانە الماتى وبلىستارىنان كەلگەن قۇتقارۋشىلار توبى، تجم جانە قم اسكەري قىزمەتشىلەرى، ەرىكتىلەر، ءىىم جانە جەرگىلىكتى اكىمدىك قىزمەتكەرلەرى.
ايتا كەتەيىك، جول توسەمىنىڭ بويىندا ۇزىندىعى 800 م جانە بيىكتىگى شامامەن 1،5 م بوگەت تۇرعىزىلعان. سۋ ايداۋ جۇمىستارى جالعاسىپ جاتىر.
