Оның айтуынша, халықтың ұсыныс-тілектерінің негізінде әзірленген Жол картасы кезең-кезеңімен орындалу үстінде. Бүгін ол білім және спорт салаларына қатысты ақпараттарға тоқталды.
– Сайлауалды бағдарламада Түркістан өңірін жан-жақты дамыту көзделген болатын. Атап айтсақ, жаңа жұмыс орындарын ашу, инфрақұрылым, ауыл шаруашылығы, спорт, денсаулық сақтау, білім беру, инвестиция тарту, туризм, кәсіпкерлік, елді мекендерді көркейту, сондай-ақ Түркістан қаласын рухани-мәдени дамыту жоспарланды.
Облыс көлемінде 2022 жылдың 5 айы бойынша Жол картаның 190 тармағы орындалып отыр. Солардың бірі көршілес Өзбекстан елінен Сарыағаш ауданына қайтарылған Бағыс ауылында құрылысы басталған жаңа мектепті айта аламыз. Ғ.Мұратбаев атындағы №23 мектеп сыйымдылығы төмен және апатты жағдайда болғандықтан жаңа мектепке мұқтаждық туындады.
![](/uploads/images/20240127181517139.jpg)
Мұнан бөлек, күні кеше Түркістан қаласында теннис орталығы ашылды. Бұл шараның орындалу уақыты 2024 жылға жоспарланған еді. Жол картаның «Бұқаралық спортпен айналысуға жағдай жасау» 3.4 тармағына сәйкес жоспарланған уақытынан 2 жыл бұрын іске асырылды. Бюджет құны 2 млрд. 215 мың теңгені құрайды. Нысанның жалпы ауданы – 5 мың шаршы метр. Бұл Жол картасы аясында рухани шаһарда ашылған 3-ші спорттық нысан. Алғашқысы 7 мың орындық «Түркістан Арена» стадионы болса, кейінгісі «Olympic center» спорт кешені былтыр қолданысқа берілген.
Еске салсақ, 2021 жылы Түркістан облысы бойынша 1597 іс-шара жоспарланып, оның 95%- ы орындалған. Өңірде 44 жаңа мектеп, 1 балабақша ашылды. Сондай-ақ Ордабасы ауданы, Төрткүл елді мекенінде 150 адамдық спорттық-сауықтыру кешені, Қазығұрт, Созақ, Сарыағаш аудандарының елді мекендерінде спорт алаңшалары да пайдалануға берілген.