Астанада өткен Amanat партиясының XXVI съезінде Мәжіліс депутаты Үнзила Шапақ партияның “Әділет” партиясымен бірігу бастамасын қолдайтынын мәлімдеді, деп хабарлайды dalanews.kz.
Оның айтуынша, қазіргі кезеңде саяси келіспеушіліктерден гөрі ұлт мүддесі, елдегі тұрақтылық пен даму басым болуы тиіс.
“Amanat” пен “Әділет” партияларын біріктіру бастамасын қоғам мен мемлекеттің мүддесіне қызмет ететін саяси күштердің әлеуетін одан әрі арттыруға бағытталған шешім ретінде қарастырамыз”, – деді депутат.
Үнзила Шапақ әр партияның өз ұстанымы мен ерекшелігі болғанымен, оларды ортақ құндылықтар біріктіретінін атап өтті. Оның қатарында жаңартылған Конституцияда бекітілген әділетті мемлекет құру қағидаты, тәуелсіз Қазақстанның тұрақтылығы мен қауіпсіздігі, азаматтардың әл-ауқаты және келер ұрпақтың болашағы бар.
Депутаттың пікірінше, бұл қадам – саяси жүйенің табиғи дамуының көрінісі әрі ел мүддесіне қызмет ететін күштердің ортақ мақсат жолында топтасуға дайын екенінің дәлелі.
Сондай-ақ ол қоғам сенімін нығайтуға, реформаларды жалғастыруға және мемлекетті дамытуға бағытталған жұмыстар алдағы уақытта да өзгеріссіз қалатынын айтты. Оның сөзінше, осы жолда тараптар күш біріктіріп, ел игілігі үшін еңбек етуді жалғастырады.
